Eamiálbmot ja etnihkalašvuohta, Kide 3/2013
Eamiálbmogat leat etnihkalaš joavkkut, geat juogadit dihtolágan eallinoktavuođa. Go hállojuvvo etnihkalaš joavkkuin ja daid meroštallamis, lea gažaldat álot olbmuid gaskasaš oktavuođain. Nappo das, mo olbmot áddejit iežaset earáid ektui, ja mo dat gaskavuođat dihttojit ja oidnojit beaivválaš gulahallamis. Nappo ”eamiálbmot” ii leat objektiivvalaš, olbmuid gaskavuođain luovos entitehtta, man sáhttá gávdnat ovdamearkan virgeoapmahašregistaraid dahje sohkamuora dutkamiin. Go jearaldat lea olbmuid gaskasaš oktavuođain ja kultuvrrain, etnihkalaš ráját eai goittotge leat goassige bissovaččat ja fásta, muhto dat ellet ja nuppástuvvet servodaga ja politihkalaš diliid mielde. Dihto historjjálaš áiggiin joavkkut lávget ja ráját čavget, ja gaskkohagaid vuorrováikkuhus ja sirdáseapmi etnihkalaš joavkkus nubbái sáhttá leat oallege friija. Etnihkalašvuohta šaddá ja lea dáhpáhuvvan geažos áigge, muhto dat ii sáhte ollašuvvat fáhkkestaga olbmo iežas dahje váldoálbmoga politihkalaš mearrádusain. Sosiálalaš duođalašvuođa muhttašuvvan lea álot njoazit go politihkalaš lihkadusaid riegádeapmi.
Sanna Valkonen, dutki, Servodatdiehtagiid dieđagoddi |