CAP-SHARE - Hukset máhtolašvuođa servodaga, mearrádusdahkkiid ja dutkiid ovttasbarggu vehkiin

Pigga Keskitalo

Professor Pigga Keskitalo lea eret Ohcejogas ja orru dán áigge Eanodagas. Son doaibmá bajásgeassindiehtagiid professoran Lappi universitehtas ja jođiha CAP-SHARE Suoma oassefitnu. Keskitalo lea luohkkáoahpaheaddji ja nákkáhalai Lappi universitehtas jagi 2010 pedagogihka doavttirin sámi skuvlla kulturhearkivuođas. Ovdal son lea bargan Sámi allaskuvllas oahpaheaddjeskuvlejeaddjin. 

Keskitalo barggu guovddážis leat árktalaš skuvlen, sámegielat ja pedagogihkka, gielalaš ja kultuvrralaš ovttaveardásašvuohta ja maiddái mánáid ja nuoráid searvevuohta nuppástuvvi diliin. Son geavaha barggustis servodatlaš searvadeaddji vugiid, main báikkálaš diehtu, vásáhusat ja iešguđet ahkásaš olbmuid oaidninvuogit leat fárus skuvlejumi ovddideamis. 

CAP-SHARE-fitnus Suomas vuodjut dasa, mo nuorat, skuvllat, mearrádusdahkkit ja servodat ovttas sáhttet hukset searvadeaddji ja ovttaveardásaš vugiid vástidit biodiversitehta gažaldagaide ja dálkkádatrievdama váikkuhusaide. Eamiálbmotoaidninvuohki mearkkaša dás dan, ahte sámeservošiid gielat, kultuvra ja báikkálaš birrasii gullevaš diehtu leat fárus mearrádusdahkamis ja boahttevuođa čovdosiid hábmemis. Guorahallama vuolde leat maid gažaldagat, mat laktásit eallinbirrasa rievdamii, eanageavaheapmái, luonddu girjáivuhtii ja árbevirolaš ealáhusaide. 

Fitnus geavahit earret eará digitála ja hutkalaš vugiid, nugo máinnasteami, visuála ja báikái gullevaš bargobájiid sihke iešguđetlágan báikkálaš birrasii ja lundui doarjaleaddji oahppanbirrasiid. Ulbmilin lea hukset sajiid, main nuorat sáhttet meroštallat iežaset oaidninvugiid ceavzilis boahttevuođas ja oassálastit maiddái hástaleaddji birasgažaldagaid gieđahallamii ovttas báikkálaš doaibmiiguin.