Lohkanlihkku
Lohkanlihkku lij koumm eeʹjj piʹštti Interreg Aurora -oouʹdeemhaʹŋǩǩõs. Haʹŋǩǩõõzz täävtõssân lij tueʹrjjeed sääʹmǩiõli alggmättʼtõzz vueʹjj da raajjâd viiđin sääʹmǩiõlin lookkâm- da ǩeeʹrjemtääid mättjemsiõrr, Lohkanlihkku. Lââʹssen saakkummšin da sääʹmõutstõõzz vuässâttmõõžžin lij haʹŋǩǩõõzzâst kõskksaž rool. Lohkanlihkku lij tâʹvvsääʹmǩiõʹlle da miârkat lookkmõõžž leekk.
Sääʹmǩiõl mättʼtõõzzâst vaʹǯǯtõssân lij leämmaž kuuʹǩǩääiʹj mättmateriaal vääʹnn. Uʹčteeʹl feʹrttje täujja jiijj puuʹtʼted materiaalid leʹbe ââʹnned vuäʹmm mättmateriaalid. Tän taʹrbbe vaʹsttad Lohkanlihkku. Lohkanlihkku-haʹŋǩǩõõzz täävtõssân lij raajjâd viiđin sääʹmǩiõlin digitaalʼlaž mättjemsiõrr, kååʹtt oouʹdad da nâânad päärnai lookkâm- da ǩeeʹrjtemtääid. Lââʹssen haʹŋǩǩõs tueʹrjjad da tuʹtǩǩad sääʹmǩiõli lookkâm- da ǩeeʹrjtemtääid mättʼtõõzz.
Lohkanlihkku-siõrr raajât lääʹddǩiõllsa Lukukupla-siõr vuâđald. Lukukupla lij veiddsânji tuʹtǩǩuum, da tõn tåimmamlogiikk vueiʹtlvâstt päärna persoonʼnallšem lookkâm- da ǩeeʹrjtemtääid ärvvtõõllmõõžž. Siõrr šiõttââll harjjtõõzzid škooulneeʹǩǩ persoonʼnallšmi taarbi mieʹldd. Lohkanlihkku šâdd määustaa laaddâmnalla mobiilaparaattid. Haʹŋǩǩõõzz ǩiõl liâ aanarsääʹmm, tâʹvvsääʹmm, juuʹlevsääʹmm, saujjsääʹmm da nuõrttsääʹmm.
Lohkanlihkku-haʹŋǩǩõs kåčč sääʹmǩiõli uʹčteeʹlid, škooulniiʹǩǩid, puärrsid da sääʹmõutstõõzz vuäzzlaid vuässõõttâd aktiivlânji ouʹddnemtuõjju da ainsmâʹtted, što siõrr sueiʹmkrâstt sääʹmkulttuur da mättʼtõõzz tuõttlažvuõđ. Haʹŋǩǩõõzzâst jäʹrjstet še škooulkueʹssreeisaid da tuâjjpaaʹjid uʹčteeʹlid di škooulniiʹǩǩid.
Tuâjj-jouʹǩǩe koʹlle Lappi universiteʹtt, Jyväskylä universiteʹtt, Uuʹme universiteʹtt da Sääʹm õllškooul. Haʹŋǩǩõõzz jååʹđat Lappi universiteeʹtt professor Pigga Keskitalo. Teäggteeʹjen tåimm Interreg Aurora. Lappi da Jyväskylä universiteeʹtti meersaž teäggtõsvuässõs puätt Lappi leettast. Taar vueʹsstååimaid teäggte Interreg Aurora lââʹssen Taar Sääʹmteʹǧǧ, Barents-piisarkåʹdd, Trooms mäddkådd di Sääʹm õllškooul.
Haʹŋǩǩõõzz tååim juâkkjâʹvve kouʹmme tuâjjpaʹǩetta:
- Sääʹmǩiõli alggmättʼtõõzz vueʹjj da mõõntõõllmõõžži nâânummuš
Vuõssmõs vueʹssvuuʹd täävtõssân lij nââneed sääʹmǩiõli lookkâm- da ǩeeʹrjtemtääid mättʼtõõzz vueʹjj da mõõntõõllmõõžžid. Uʹčteeʹlmainstâttmõõžži veäkka haʹŋǩǩõõzzâst noorât teâđaid sääʹmǩiõli alggmätttõõzzâst da lookkmõõžž di ǩeeʹrjtummuž mättʼtõsmõõntõõllmõõžžin. Teâtt vuäʹppast siõr ouddnummuž vaʹstteed mättʼtõõzz taarbid.
- Siõr raajjmõš viiđin sääʹmǩiõlin
Nuʹbb tuâjjpaʹǩat čiŋlmââvv uʹčteeʹli škooultummša di sääʹmǩiõli mättʼtõõzz siõrrtâttmõʹšše. Sääʹmkulttuur puätt kuâsttjempâjja siõrâst ǩiõl lââʹssen graaflaž elemeeʹnti di musiikk pääiʹǩ. Teʹsttjummuž da škooulpilotâsttmõõžž veäkka ärvvtõõlât, mäʹhtt siõrr tåimm mättʼtõõzzâst da måkam vuârddmõõžž õutstõõzzin lij siiskâžlaž di kulttuursai elemeeʹnti kõõsk. Tän lââʹssen haʹŋǩǩõõzzâst oouʹdeet kaʹtti vuäppõõzz siõr âânnmõʹšše mättʼtõõzzâst di siõr šiõttõõllmõʹšše sääʹmǩiõlid.
- Teâđtõs da siõr õõlmstõs
Haʹŋǩǩõõzz poodd dokumentââʹstet da jueʹjjet aktiivlânji puk haʹŋǩǩõõzz tååim. Haʹŋǩǩõs jääʹrjast webinaarid, škoouljååttmõõžžid da vuõinnlõõttmõõžžid. Tuâjast õlmstââʹttet tiõđlaž artikkeeʹlid da rapoortid. Lohkanlihkku-siõrr õlmstââʹttet nuʹttǩani laaddâmnalla mobiilaparaattid.
Interreg Aurora
Sosiaalʼlaž, ekolooglaž da ekonoomlaž ǩeâllʼjeei ouddnummuš liâ Interreg Aurora -prograamm aalmilaž täävtõõzz. Puk haʹŋǩǩõõzz, koid Interreg Aurora teäggat, liâ čõnnõõttâm oouʹdeed Õhttõõvvâm meerkooʹddi ǩeâllʼjeei ouddnummuž täävtõõzzid.
Lohkanlihkku-haʹŋǩǩõs oouʹdad vuõss-sâjjsânji täid ÕM ǩeâllʼjeei ouddnummuž täävtõõzzid:
4 - Pueʹrr škooultõs
8 - Ooumažärvvsaž tuâj da tällõs-šõddmõõžž
10 - Jeeʹresärvvsažvuõđi uuʹccummuš
16 - Rääuh da vuõiggâdvuõđmeâldlažvuõđ
17 - Õhttsažtuâjj da kueiʹmmvuõtt