Lohkanlihkku
Lohkanlihkku lea golmmajahkásaš Interreg Aurora -ovddidanprošeakta. Prošeavtta ulbmilin lea gártet sámegielaid álgooahpahusa dili ja hukset viđa sámegillii lohkama ja čállima oahppanspealu, Lohkanlihku. Dan lassin diehtojuohkin ja skuvlen leat prošeavttas guovddáš rollas.
Sámeoahpahusas hástalussan lea guhkit áigge leamaš oahpponeavvuid váilun. Oahpaheaddjit šaddet dávjá ieža ráhkadit materiálaid dahje geavahit boarásmuvvan materiálaid. Dan dárbbu duste Lohkanlihkku. Lohkanlihkku-prošeavtta ulbmilin lea hukset viđa sámegillii digitála oahppanspealu, mii ovdánahttá ja nanne mánáid lohkan- ja čállinmáhtu. Dan lassin prošeakta gárte sámegielaid lohkama ja čállima oahpahusa.
Lohkanlihkku-speallu huksejuvvo suomagielat Lukukupla-spealu vuođul. Lukukupla lea viidát dutkojuvvon, ja dan doaibmajurdaga mielde lea vejolaš beassat diehtit makkár dásis máná individuála lohkan- ja čállinmáhttu lea. Speallu heiveha hárjehusaid máná dárbbuid mielde. Lohkanlihkku-speallu boahtá leat nuvttá luđemis sihke dihtorii ja mobiilarusttegiidda. Prošeavtta gielat leat anárašgiella, davvisámegiella, julevsámegiella, lullisámegiella ja nuortalašgiella.
Lohkanlihkku-prošeakta bovde sámi oahpaheaddjiid, oahppiid, váhnemiid ja servošiid váikkuheaddjiid searvat aktiivvalaččat ovdánahttinprosessii ja sihkkarastit ahte speallu čájeha sámi kultuvrra ja oahpahusa duohtavuođa. Prošeavtta olis lágidit maiddái skuvlejumiid ja bargobajiid skuvllaide ja oahpaheaddjiide.
Bargojoavkkus leat mielde Lappi universitehta, Jyväskylä universitehta, Ubmi universitehta ja Sámi allaskuvla. Fitnu jođiha Lappi universitehta professor Pigga Keskitalo. Prošeavtta ruhtada Interreg Aurora. Lappi ja Jyväskylä universitehtaide našuvnnalaš ruhtadanoassi boahtá Lappi lihtus. Norgga doaimmaid ruhtadit Interreg Aurora lassin Norgga Sámediggi, Barents Secreteriat, Romssa fylkkasuohkan ja Sámi allaskuvla.
Prošeavtta doaimmat bargoosiid mielde:
1. Sámegielat álgooahpahusa dili ja metodaid gárten
Vuosttaš bargopakeahta ulbmilin lea gártet sámegielaid lohkama ja čállima oahpahusa dili ja metodaid. Oahpaheaddjejearahallamiid bokte bargojoavku čohkke dieđuid sámegiela álgooahpahusa dilis ja lohkama- ja čállima oahpahusmetodain. Dat dieđut galget veahkehit hukset spealu sámegielaid lohkan- ja čállinoahpahusa dárbbuide.
2. Spealu huksen viđa sámegillii
Nuppi bargopakeahtas spellui huksejuvvojit sámegielaide ja sámekultuvrii heivehuvvon sisdoalut. Sámekultuvra boahtá oidnosii spealus giela ja maiddái gráfalaš elemeanttaid ja musihka bokte. Bargobajiid ja pilohtatestema bokte mii guorahallat, mo speallu doaibmá oahpahusas ja makkár doaivagat servošis leat spealu kultuvrralaš elemeanttaid ektui.
3. Diehtojuohkin
Fitnu bargojoavku dokumentere ja juohká buot prošeavtta doaimmaid aktiivvalaččat. Prošeavtta olis lágiduvvojit webinárat, skuvlejumit ja deaivvadeamit. Barggu birra čállojuvvojit dieđalaš artihkkalat ja raporttat.
Interreg Aurora ja nanaguoddevaš ovdnáneapmi
Sosiála, ekologálaš ja ekonomálaš nanaguoddevaš ovdáneapmi lea Interreg Aurora -prográmma oppalaš ulbmil. Buot fitnut maid Interreg Aurora ruhtada ovddidit ON (Ovttastuvvan našuvnnat) nanaguoddevaš ovdáneami mihttomeriid.
Lohkanlihkku -fidnu ovddida ovddemušas dáid ON nanaguoddevaš ovdáneami ulbmiliid:
4 - Quality education
8 - Decent Work and Economic Growth
10 - Reduced in equalities
16 - Peace, Justice and Strong Institutions
17 - Partnerships for the Goals