Mainâsviäsu-spellâ já oppâmpiirâs láá tääl finniimist anarâš-, tave- já nuorttâlâškielân. Speelâ puáhtá spellâđ nuuvtá neetist já tom puáhtá kevttiđ sämikielâ máttááttâsâst.

Sämikielâlij Mainâsviäsu-speelâi ulmen lii lasettiđ sämikielâi digitaallijd falâlduvâid já faallâđ nuoráid oovtâviärdásijd máhđulâšvuođâid ovdediđ maaŋgâluuhâmtááiđu sii jieijâs kielân. Sämikielâ máttááttâsâst lii kuhháá lamaš vänivuotâ puorijn digitaallijn oppâmaterialijn, já Mainâsviäsu sämikielân -haahâ västid taan vänivuotân.

Haavâ jođetteijee Outi Kallionpää Laapi ollâopâttuvâst muštâl, et spellâliih oppâmpirrâseh láá tutkâmušâi mield pehtilis vyehi tuárjuđ oppâmmoovtâ. Toh tuáimih eromâš pyereest talle ko ärbivuáválâš škovlâpargo ij teeivâ nuorâi argâpeeivi mediakevttimáin.

– Mainâsviäsu puáhtá škoovlâ aldeláá nuorâi digitaallii argâpeeivi já movtijdit sii luuhâđ já čäälliđ. Sämikielâliih speelah fäälih nuoráid merhâšittee saje jieijâs kielâ kevttimân já kielâtááiđu naanoodmân, Kallionpää muštâl.

Mainâsviäsu lii movtijdittee, vuáruvaigutteijee já kulttuurlávt sensitiivlâš oppâmpiirâs, kost sämikielâ oppâm tábáhtuvá spellâm já kreatiivlii čäällim peht.

– Jieijâskielâlâš digitaallâš piirâs tuárju kielâtááiđu, mutâ meid lasseet kielâkevttim škoovlâst já meid ton ulguubeln, iätá Laapi ollâopâttuv šoddâdemtiettui, eromâšávt arktâsij škovlimkoččâmušâi, professor Pigga Keskitalo.

Sämikielâliih toorjâmaterialeh iššeen kevttimist

Mainâsviäsu-speelâi toorjâmaterialin láá rahtum čielgâ spellâmravvuuh já máttáátteijee pedagogisiih ravvuuh. Materialeh išedeh spellâm älgimist já tuárjuh máttáátteijeid uđđâlágán material kevttimist.

Haavâst uárnejuvvojeh meid ávus webinareh, main čáittojeh Mainâsviäsu pedagogisiih máhđulâšvuođah já juáhhojeh keevâtliih ovdâmeerhah tast, maht spelâiguin puáhtá ávhástâllâđ máttááttâsâst.

Mainâsviäsu sämikielân -haavâst

Laapi ollâopâttuv jođettem haavâ oovtâstpargokyeimin láá Oulu ollâopâttuv INTERACT- já OASIS-tutkâmjuávhuh já Oulu áámmátollâškoovlâ spellâovdedemohtâdâh. Sämikielâlii spellâovdedem lii koordinistám nuorâb totkee Maiju Saijets. Haahâ olášuttoo iivij 2025–2026 ääigi já tom ruttâdeh Media-alan tutkimussäätiö já Suomâ kulttuurruttârááju Laapi kuávluruttârááju.

Uáppáásm tärhibeht Mainâsviäsu sämikielân -haahân: https://pelaakeksikirjoita.fi/tarinatalo-menee-saamenmaalle/

Spellâtrailerij kielâversioh:

Trailer suomâkielâ
Trailer anarâškielâ
Trailer nuorttâlâškielâ
Trailer tavesämikielâ