Rievdan – Muutos -čájáhus Anára Sajosis rahpá servošiid geahččanguovlluid davvi eallinbirrasa rievdamii

Anára Sámekulturguovddáš Sajosis rahpasa Rievdan – Muutos -čájáhus, mii čohkke oktii Sámis ollašuhtton searvvušlaš dáiddabargobájiid proseassa ja dáiddabargobájiin dahkkojuvvon dujiid. Čájáhusa rahpandoalut ordnejuvvojit čakčamánu 8. beaivve diibmu 11.00, ja čájáhussii beassá oahpásmuvvat čakčamánu 17. beaivvi rádjái.

Rievdan – Muutos -čájáhusa duojit leat ollašuhttojuvvon oassin Lappi universitehta dáidagiid dieđagotti seammanammasaš, guovttejagát prošeavtta. Prošeakta lea ovddidan searvvušlaš dáiddabajásgeassima vugiid Sámis, eandalii Vuohčus Suoma beale Sámis ja Kárášjogas Norggas. Prošeavtta ollašuhttin searvvušlaš dáiddabargobájiid váldotemán lea leamaš suokkardallat ovttas davvi eallinbirrasiid rievdama.

Čájáhusa duojit muitalit eallinbirrasa ja kultuvrra mearkkašumiin ja bargobájiide oassálastán olbmuid jurdagiin davvi guovllus, mii nuppástuvvá. Guktuin báikegottiin ordnejuvvon skuvlalaččaid dáiddabargobájiin oassálastit leat dahkan earet eará čuovga- ja jietnadáidaga, gáhtadáidaga ja animašuvnnaid, ja oahpásmuvvan báikkálaš máidnasiidda ja kulturárbái.

Sajosa šilljui lea buktojuvvon oassin čájáhusa maiddái Vuohčus miessemánus 2026 skuvlla ja giliservoša oktasaš bargu Luovvi. Luovvi huksejuvvui gili olbmuide rabas dáiddabájis. Luovi ala válljejuvvojedje ovttas govat, mat muitalit Vuohču ovddeš ja dálá ássiid árggas sihke sidjiide dehálaš áššiin ja báikkiin. Sohkabuolvvaid rasttildeaddji oktavuohta addá fámu nuppástusaide ja nanne vuogáiduvvama boahttevuhtii.

Čájáhusa rahpandoaluide Sajosii čakčamánu 8. beaivve bohtet buot Vuohču skuvlla oahppit sihke oahpaheaddjit ja eará ovttasbargooassebealit. Rahpandoaluin gullat sáhkavuoruid ja eará čájáhusaid lassin maiddái Elmiinná ja Ante Jalvela jietnaduovdaga, mii hápmašuvvá lávlaga, luođi ja perkussiiva gitára vugiiguin ja mas dahkkiid mielde johtet nu doložat go boahttevaččatge.

Rievdan – Muutos -čájáhus

8.–17.9.2026
Rahpandoalut 8.9.2026 diibmu 11.00
Anára Sámekulturguovddáš Sajos, Menesjärventie 2A, Inari
Rabas ma–be diibmu 9.00–17.00
Friddja sisabeassan.

Rievdan – Muutos -prošeakta ovddida árktalaš ođasmahtti dáiddabajásgeassima

Rievdan – Muutos -prošeavttas leat ovddidan guovtti jagi áigge searvvušlaš dáiddabajásgeassima vugiid Vuohčus Suoma beale Sámis ja Kárášjogas Norggas. Bargobájiin leat suokkardallan ássiid iežaset vejolašvuođaid váikkuhit positiivvalaččat dasa, man guvlui rievdan dáhpáhuvvá. Prošeavtta bargobájit ja dáhpáhusat leat buktán oktii bearrašiid, boarrásiid, nuoraid ja skuvlalaččaid gieđahallat rievdama temáid.

Suoma bealde prošeavtta ovttasbargoguoibmi lea Sámi mánáidkulturguovddáš Mánnu ja Kárášjogas Sámi dáiddaguovddáš. Prošeavtta ruhtada Koneen Säätiö (Kone Foanda), ja dan jođiha govvadáiddabajásgeassima professor Mirja Hiltunen Lappi universitehta dáidagiid dieđagottis. Prošeavtta prošeaktadutkin ja koordináhtorin doaibmá Korinna Korsström-Magga ja dutkanassisteantan Ante Jalvela. Prošeavttas ovddidit ođasmahtti árktalaš dáiddabajásgeassima Lappi universitehta dáidagiid dieđagottis.

Lassedieđut:

Govvadáiddabajásgeassima professor Mirja Hiltunen, prošeavtta jođiheaddji
mirja.hiltunen (at) ulapland.fi
Tel. +358 40 484 4373

Korinna Korsström-Magga, dáidaga doavttir, postdoc-dutki ja prošeavtta koordináhtor
kkorsstr (at) ulapland.fi
Tel. +358 40 574 98 75