Lappi universiteahtta nanne oassin INMERS-prošeavtta suoma- ja sámegielat boarrásut olbmuid medialohkandáiddu Lappi guovllus. Prošeavtta ulbmil lea maid nannet boarrásut olbmuid máhtu dovdat ja easttadit disinformašuvnna.

Espanja, Romania ja Suoma doaresbeale guovlluin leat servodagas seammasullasaš hástalusat: olbmot boarásnuvvet, mátkkit leat guhkit ja bálvalusat unnán. Dáin guovlluin geavahit maiddái máŋggaid gielaid báldalágaid, dego Davvi-Suomas sáme- ja suomagiela.

Lappi universiteahta bajásgeassindiehtagiid professor Päivi Rasi-Heikkinen muitala, ahte boarrásut olbmuin leat hástalusat doaibmat servodaga dievaslaš lahttun, jus sis ii leat doarvái buorre medialohkandáidu.  Kritihkalaš jurddašeami doarjun lea dehálaš danin go disinformašuvnna mearri lea lassánan. Disinformašuvnnain dárkkuhuvvo dakkár boasttodieđu juohkin, man ulbmilin lea dájuhit olbmuid.  

– Mii háliidit gávdnat vugiid, maiguin mii sáhttit nannet doaresbeale guovlluin ássi olbmuid medialohkandáiddu ja dan bokte oassálastima digitála servodagas, Rasi-Heikkinen dadjá.

Rasi-Heikkinen jođiha Lappi universiteahta dutkiid barggu eurohpálaš INMERS (International Media Literacy – Empowered Rural Seniors) -prošeavttas davvi guovlluid, oasalašvuođa ja medialohkandáiddu áššedovdin.

Álggus lea ulbmil čielggadit, makkár dárbbut guđege guovllu badjel 65-jahkásaš olbmuin leat medialohkandáidduid ovddideapmái. Daid vuođul plánejuvvojit ja ollašuhttojuvvojit skuvlejumit: Espanja Navarras spánskka ja euskaragillii, Romania Transilvanias romana ja uŋgárgillii ja Davvi-Suomas suoma- ja sámegillii.

– Sámegielat boarrásut olbmuide máŋggagielatvuohta lea riggodat, ja lea dehálaš nannet medialohkandáiddu olbmo iežas eatnigillii, Lappi universiteahta nuorat dutki Maiju Saijets dadjá.

Dasa lassin prošeavttas ollašuhttojuvvojit skuvlejumit dakkár doibmiide, geat barget boarrásut olbmuiguin ja prošeavtta áigge čállojuvvo oktasaš eurohpalaš medialohkandáiddu ofelaš. Ofelaš almmustahttojuvvo maid Suomas hállojuvvon sámegielain nappo anáraš-, davvi- ja nuortalašgillii.  

INMERS (International Media Literacy – Empowered Rural Seniors) -prošeavtta birra
  • Prošeavttas nannejuvvo doares beale olbmuid medialohkandáidu, kritihkalaš jurddašeapmi ja oasálašvuohta digitála servodagas.
  • Prošeavtta ollislaš bušeahtta lea s. 500 000 euro, mas sullii s. 350 000 euro ruhtadeapmi boahtá Eurohpá kommišuvnna Kreatiiva Eurohpá -prográmmas.
  • Prošeavtta jođiha Navarra ráđđehus ja ovttasbargoguoibmin leat NASERTIC, Navarra universiteahtta, Lappi universiteahtta, Navarra konstruktiivvalaš journalismma instituhtta ja Romanias Funky Citizens -organisašuvdna. Ovttasbarggus leat mielde maiddái Ukraina Media- ja gulahallaninstituhtta ja Estte álbmotgirjerádju.
  • Prošeavtta áigodat lea 1.4.2026-31.3.2028
Lassedieđut

Päivi Rasi-Heikkinen
Lappi universiteahtta
+358 40 4844 240
paivi.rasi-heikkinen@ulapland.fi

Maiju Saijets
Lappi universiteahtta
+358 40 543 8991
maiju.saijets@ulapland.fi