Maainâspõrtt-mättjempirrõs lij ååʹn vuäǯǯamnalla kooum Lääʹddjânnmest mainstum sääʹmǩiõʹlle: tâʹvv-, aanar- da nuõrttsääʹmǩiõʹlle. Neeʹttest ǩeän täättas ââʹnnemnalla leʹddi speâll tuärjjee sääʹmǩiõli mättʼtõõzz da mättjummuž.

Sääʹmǩiõllsaž Maainâspõrtt-speâllai täävtõssân lie lââʹzzted sääʹmǩiõli digitaalʼlaž vuällamvuõđ di taʹrjjeed nuõrid õõutverddsaž vueiʹttemvuõđid oouʹdeed mäŋgglookkâmtääidaid jiijjâz ǩiõʹlle. Sääʹmǩiõli mättʼtõõzzâst lij kuuʹǩǩ leämmaž vääʹnn õll tässʼsaž digitaalʼlaž mättmateriaalin, da Maainâspõrtt säämas -haʹŋǩǩõs vaʹsttad tän mättmateriaalvänna.

Haʹŋǩǩõõzz jååʹđteei Outi Kallionpää Lappi universiteeʹttest mušttal, što speâllʼlaž mättjempirrõõzz lie tuʹtǩǩummši mieʹldd viõkkšõs kuånstt mättʼtõõttâm-motivaatio tuärjjummša. Tõk toiʹmmje jeäʹrben vuõʹjjin, koin äʹrbbvuõđlaž škooultuâjj ij teeiv nuõri aarǥâst šõddi media-âânnmõõžž.

– Maainâspõrtt pohtt škooul âʹlddlakkše nuõri digitaalʼlaž aarǥ da älšsmâtt siʹjjid lookkâd da ǩeeʹrjted. Sääʹmǩiõllsa speâll taʹrjjee nuõrid miârktõõzzlaž sââʹj jiijjâz ǩiõl âânnmõʹšše da ravvummša, Kallionpää mušttal.

Maainâspõrtt lij motivõʹstti, vuârrvaaiktõõzzlaž da kulttuurlânji sensitiivlaž mättjempirrõs, koʹst sääʹmǩiõli mättjummuš šâdd speâllmõõžž da kreevsõs ǩeeʹrjtummuž pääiʹǩ.

– Sääʹmǩiõllsaž mättjeeʹjid jiijjâsǩiõllsaž digitaalʼlaž pirrõs tuärjjad ǩiõlltääid ouddnummuž lââʹssen ǩiõl âânnmõõžž škooul aarǥâst da tõn åålǥpeäʹlnn, mušttal Lappi universiteeʹtt pedagogikktiõttji, jeäʹrben aarktlaž škooultõskõõččmõõžži professor Pigga Keskitalo.

Sääʹmǩiõllsa tuärjjmateriaal hiâlpte âânnmõõžž

Sääʹmǩiõllsaž Maainâspõrtt-speâllai tuärjjan mättʼtõsâânnmõʹšše leät tuejjääm čiõlgg speâllamvuäʹppõõzzid da pedagooglaž vuäʹpstõõzz. Materiaal hiâlpte speâllai ââʹnnmavälddmõõžž da tuärjjee uʹčteeʹlid ođđnallšem ǩiõll- da mäŋgglookkâmtäiddpedagogiikk ravvummšest.

Haʹŋǩǩõõzzâst riâžžât še äävas webinaarid, koin čuäjtõõlât Maainâspõõrt pedagooglaž vueiʹttemvuõđid da jueʹjjet ouddmiârkid tõʹst, mäʹhtt speâll vuäitt äuʹǩǩeed mättʼtõõzzâst.

Maainâspõrtt säämas -haʹŋǩǩõõzzâst

Lappi universiteeʹtt jååʹđtem haʹŋǩǩõõzz õhttsažtuâjjkueiʹmmen lie Oulu universiteeʹtt INTERACT- da OASIS-tuʹtǩǩeemjoouk di Oulu ämmatõllškooul speâlloouʹdeemjuâǥǥas. Sääʹmǩiõllsaž speâllai oouʹdummuž lij koordinâsttam nuõrab tuʹtǩǩeei Maiju Saijets. Haʹŋǩǩõõzz viiǥǥât čõõđ 2025–2026 da tõn teäggte Mediasueʹrj tuʹtǩǩeemfondd da Lääʹddjânnam kulttuurfoond Lappi vuʹvddfondd.

Tobdstõõđ tääʹrǩben Maainâspõrtt säämas -haʹŋǩǩõʹsse: https://pelaakeksikirjoita.fi/tarinatalo-menee-saamenmaalle/

Speâlltraileeʹri ǩiõllversio:

Trailer lääʹddǩiõll
Trailer aanarsääʹmǩiõll
Trailer nuõrttsääʹmǩiõll
Trailer tâʹvvsääʹmǩiõll