TemaNord-rááiđu raapoort Indigenous tourism in the European Arctic – Reclaiming pasts and strengthening futures vuájudât algâaalmugmaađhâšmân Euroop arktisii kuávlust. Tot puáhtá oovdân šiev vuáválâšvuođâid, uđđâ aldanemvuovijd sehe máhđulâšvuođâid já háástuid. Vâi mađhâšem ličij killeel, tot váátá, et algâaalmugij kulttuuráid hämmejuvvoo saje miänástuđ jieijâs iävtuiguin.

Indigenous tourism in the European Arctic – Reclaiming pasts and strengthening futures – raapoort sierriittâl nelji nubijdis lohtâseijee teema, moh láá kuávdááh algâaalmugmađhâšem ovdedem já nanodem várás. Teemah láá algâaalmugmađhâšem koskâvuotâ sajan já enâmân, mainâstem kuávdážin uássin dekolonisaatiost, sertifikistmeh já täävvirmeerhah jiešmeridemvuoigâdvuođâ já finnodâhtooimâ ovdedem niävvun sehe oovtâstpargo já siärváduv uásálistittem velttimettumis lävkkin ovdâskulij pesâmist.

– Mij lep siämmáá uáivilist raapoort juurdâpuátusáin: kilelis mađhâšem váátá saje hammim algâaalmug kulttuuráid, vâi toh pyehtih miänástuđ jieijâs iävtuiguin. Raapoort lii ávhálâš mii mađhâšemhavváid, muštâl Silje Karine Muotka, Taažâ sämitige saavâjođetteijee.

Raportist hundâruššojeh meid toh máhđulâšvuođah, maid tuoijum, taiđuu já hammiistâllâm ovtâstittem maađhâšmân puáhtá faallâđ.

Ton lasseen tot addel torjuu mađhâšem čuosâttâhorganisaatioi já irâtteijei kilelis finnodâhtoimâčuávdusij ovdedem várás já iššeed poolitlijd merideijeid ovdediđ algâaalmugmađhâšem miänástuđ arktisii kuávlust.

– Raapoort tuárju Tave-eennâmlii arktisii ohjelm ulme: tot oovded páihálij finnodâhtoimâmáhđulâšvuođâi ovdedem já ruttâtuálu kilelis stuárrum arktisii kuávlust. Mij vyerdip moovtâ pargo ovdánem, muštâl Susanne Andreasen, Grönland Tave-eennâmlii institut (NAPA) hovdâ.

Arktisâš oovtâstpargo

Raapoort kiäsá čuákán Suomâ Anarist vyesimáánust 2052 tollum Euroop algâaalmugmađhâšemkonferens EITC 2025 váldufáádáid já juurdâpuátusijd. EITC 2025 lâi vuossâmuš algâaalmugmađhâšemkonferens Euroopist. Tom uárnejii oovtâst World Indigenous Tourism Alliance, Sämitigge já Laapi ollâopâttâh.

Raapoort rahtui oovtâst algâaalmugmađhâšemtuáimeiguin Kilelis algâaalmugmađhâšem Tave-enâmij arktisijn kuávluin -haavâst. Haahâ lasettij arktisii kuávlu ohtsijd máátuid já jođálmitij kilelis algâaalmugmađhâšem naanoodmáin viärmáduvâid já oovtâstpargo, já tom ruttâdij Tave-enâmij Ministerrääđi Arktisâš oovtâstpargo-ohjelm. Haavâ partnereh lijjii Laapi ollâopâttâh, Ummee ollâopâttâh, Taažâ arktisâš ollâopâttâh UiT, Aalborg ollâopâttâh, Taažâ Sämitigge já Innovation South Greenland/Visit South Greenland. Suomâ já Ruotâ Sämitigge tuáimih haavâ oovtâstpargokyeimin.

Šleđgâhámásii almostittem pisovâš čujottâs: https://www.norden.org/en/publication/indigenous-tourism-european-arctic

Raapoort váldusoojij čuákánkiäsu posterhäämist: https://matkailu.samediggi.fi/wp-content/uploads/2025/12/EITC25-juliste.pdf