Arctic Indigenous Cinema, dáidagiid ja hábmema magisttar
Arctic Indigenous Cinema -oahppoprográmma vástida gealbohuksema ja ođđa čehppodaga dárbui, mii eamiálbmotmuitaleami audiovisuála media suorggis eandalii allaskuvladásis lea.
Oahput álget ođđajagimánus 2026
Arctic Indigenous Cinema -oahppoprográmma vástida gealbohuksema ja ođđa čehppodaga dárbui, mii eamiálbmotmuitaleami audiovisuála media suorggis eandalii allaskuvladásis lea. Prográmma vuodju eamiálbmotmuitaleapmái filmmaid ja ealligovaid bokte. Prográmma movttiidahttá studeanttaid ohcalit iežaset jienaid ja ovdanbuktit mávssolaš muitalusaid ealligovvareaidduid ja -dáidduid vehkiin. Oahpuin eamiálbmotidentitehta ja -perspektiiva leat dáiddalaš geavadaga ja akademalaš dutkamuša vuođđun.
Ohcanáigi 1.-11.9.2025!
Oahppoprográmma birra
Oahpu áigge kandidáhtta hahká dieđuid, dáiddalaš áššedovdámuša ja gelbbolašvuođa filmmaid, ealligovvašaŋgraid ja mediadáidagiid dramaturgiijas, muitalanhámiin ja ovdanbuktimis; ealligovaid, filmmaid ja interaktiiva mediabuktagiid mánusčállimis; dokumentáraid, fikšuvdnafilmmaid ja mediadáidagiid filbmaláidesteami proseassain ja buvttadanvugiin; sierralágan dáiddalaš máhtuid filbmaduddjomis ja viidáseabbot audiovisuála suorggis; ja akademalaš eamiálbmotmuitaleami dutkamis teorehtalaš dahje dáiddalaš dutkanárbevieru geahččanguovllus.