Lappi universiteahtta ođasmahttá ollislaččat dutkamuša ja skuvlejumi lagašjagiid áigge. Universiteahta stivra lea mearridan ruhtadit dutkamuša ja skuvlejumi ovddideami 2,5 miljovnnain euroin. Dasa lassin universiteahtta satse doaimma ovddideami máŋggain sierra vugiiguin. Dutkamuša ja skuvlejumi ovddidanplánas vástidit várrerektorat Sari Lindblom ja Piia Björn.

Dutkamuša ovddidanplánas Lappi universiteahta dutkamuššii leat válljen golbma deari: Árktalaš nuppástus ja vuogáiduvvan, Hábmen ja bálvalusat ja Bistevaš luonddukultuvrrat.

– Dáid oktavuhtii mii vuođđudit golbma máŋggadieđalaš ja diehtagiid gaskasaš dutkanservoša. Buot njealji dieđagotti – bajásgeassindiehtagiid, riektediehtagiid, servodatdiehtagiid ja dáidagiid diehtagiid dieđagotti – ja universiteahta Árktalaš guovddáža dutkit oassálastet servošiid dutkamuššii, dutkanvárrerektor Sari Lindblom dadjá.  

Dutkanservošiid jođiheaddjit válljejuvvojit siskkáldas ozuin. Jođiheddjiid sávvet leat innovatiivvalaččat ja čeahpit hukset gudneáŋgiris ja nana diehtagiid rasttildeaddji dutkanollisvuođa ovttas universiteahta professoriiguin ja eará dutkansuorggi bargiiguin.

Dasa lassin universiteahta stivra lea mearridan álggahit dutkanservošiidda laktáseaddji, golmma riikkaidgaskasaš tenure track -barggu ozu válmmaštallama.

– Daiguin rekryteremiiguin mii geahččalit juksat riikkaidgaskasaččat hui čeahpes olbmuid Lappi universitehtii, Lindblom čilge.

Skuvlejumi ovddidanplána vuosttas váldoulbmila mielde Lappi universitehtas leat álggahan skuvlenprográmmaid siskkáldas árvvoštallama.

Dutkanservošiidda laktáseaddji riikkaidgaskasaš magisttarprográmmaid válmmaštallan álggahuvvo dutkanservošiid organiserema oktavuođas.

– Lappi universiteahtta geahččala juksat beassat njunuš universiteahtaid jovkui. Skuvlema oasil dat dárkkuha nuppe dáfus nana ja buorre vuođđodutkkusskuvlejumi. Nuppe dáfus dat dárkkuha maid roahkkadis deattuheami magisttarprográmmaide, mat leat huksejuvvon dutkamuša deriid oktavuhtii, skuvlenvárrerektor Piia Björn dadjá.

Ovttas njunuš universiteahta guvlui

Lappi universiteahta stivrra ságadoalli Johanna Buchert lea ilus, go universiteahtas leat čielga ulbmilat dutkamuša deriide ja ahte daidda satsejit.

– Jáhkán, ahte universiteahttasearvvuš lea iluin huksemin Lappi universiteahtas buoret universiteahta, Buchert dadjá.

Maid Lappi universiteahta rektor Antti Syväjärvi deattuha universiteahttaservoša mearkkašumi ulbmiliid juksamis.

– Universiteahtta galgá dovdat dovdat nana beliidis ja stivret daidda resurssaid, go dieiguin vugiiguin dutkamuša ja oahpahusa dássi šaddet buorebun go ovdel. Ferte goittotge fuomášit, ahte alladását doibmii mii dárbbašit universiteahtas buohkaid satsema, Syväjärvi dadjá.