Máŋggaeallevaš vuoiggalašvuohta eamiálbmogiid servodagain (MultiBEING) -njunušovttadaga rahpandoalut lágiduvvojit Sámekulturguovddáš Sajosis, Anáris vuossárgga 30.3. dii 17.00–19.00. Suoma- ja sámegielat dilálašvuođa sáhkavuorut dulkojuvvojit ja streamejuvvojit.

MultiBEING-njunušovttadagas dutket dan, makkár lea olbmo ovttasvástadus fuolahit eará eallevaš áššiid buorre ja vuoiggalaš eallimis. Fidnus ovddidit máŋggaeallevaš vuoiggalašvuođa (multibeing justice) doahpaga.  Dutkamuš vuođđuduvvá algoálbmogiid iežaset jurddašanvugiide ja doahpagiidda. Daid buktet ságastallamii humanisttalaš-, servodat- ja juridihkka dutkamušain.

– Álgoálbmogiid vuohki hábmet servodagaid ja eallit ovttas eará eallevaččaiguin sáhttá buktit geahččanguovlluid ja čovdosiid dasa, mo ovddidit vuoiggalaš ja bistevaš máilmmiortnega, ovttadaga jođiheaddji, sámedutkamuša professor Sanna Valkonen lohká.

Njunušovttadat lea Suoma Akademiija ruhtadan fidnu jagiid 2026–2033 prográmmabadjái. Dan jođihit sámedutkamuša professor Sanna Valkonen Lappi universitehtas sihke eamiálbmotdutkamuša professor Pirjo Kristiina Virtanen Helssega universitehtas ja riikkaidgaskasaš rievtti professor Lotta Viikari Lappi universitehtas. 

Rahpandoaluin dutkit muitalit ja ságastallet dutkamušas, mii lea dál álgimin. Dáiddár Áilu Valle rahpá dilálašvuođa ja emeritusprofessor Veli-Pekka Lehtola ovdanbuktá kommeantasáhkavuoru. Rahpandoaluid suoma- ja sámegielat sáhkavuorut streamejuvvojit ja dilálašvuođas lea dulkon suomagillii ja davvisámegillii.

– Mii háliidit dahkat dutkamuša ovttas álgoálbmotservošiiguin ja gudnejahttit sin, ja nuba midjiide lea dehálaš lágidit njunušovttadaga almmolaš rahpandoaluid Sámis, Pirjo Kristiina Virtanen muitala.

Sáhkavuoruid maŋŋil guossohit gáfe ja olbmot sáhttet ságastallat dutkiiguin.

– Buresboahtin gullat ja ságastit! njunušovttadaga dutkit sávvet.

Lassedieđut 

Martta Alajärvi, gulahallanolmmoš, MultiBEING, +358 40 528 2599, martta.alajarvi@ulapland.fi 

Dáhpahusa dieđut ja streamenliŋka

Ođas (31.10.2025): Lappi universitehtii Suoma Akademiija dutkamuša njunušovttadat