Ođđâz

Lohkanlihkku tuâjjjoukk kaaunõʹtte Uumaja universiteeʹttest 7.5.2026 tuâjjpääʹjest. Tuâjjpääʹj poodd projeeʹkt vuäʹssbieʹlin leäi vuäittmõš ǩiõttʼtõõllâd speâll grafiikkaid, musiikk di plaaʹneed projeeʹkt puõʹtti pooddid õõutveäkka. Tuâjjpääʹjest jeäʹrben vuäjjneš sääʹmkulttuur spiõllu õhttummša. Projeʹkttjoukk kaaunõõđi še grafikkniiʹǩǩid di musikkneeʹǩǩ. Projeeʹkt puõʹtti jõnn läuʹǩǩ lij pilott-teʹsttjed tâʹvvsääʹmǩiõllsaž demoversio puõʹtti čõõuč. 

Snimldõõǥǥâst 

Pâʹjjriâddâst professor Coppélie Cocq (UMU), projeʹkttšurr Kristiina Jomppanen (ULap), unversiteʹttuʹčteeʹl Maaren Palismaa (SUAS) da veäʹǩǩprofessor Berit-Ellen Juuso (SUAS) 

Vueʹllriâddâst professor Ulla Richardson (JYU), projeʹktt-tuâjjlaž Marja Labba (UMU), professor da projeʹkttjååʹđteei Pigga Keskitalo (ULap), näggtõsǩeʹrjjtuʹtǩǩeei Laura Kotavuopio (SUAS) da tuʹtǩǩeemkoordinaattor Lea Nieminen (JYU) 

Lohkanlihkku-projeʹktt jäʹrjsti 8.–10.4.2026 tuâjjpääʹj Aanrest. Tuâjjpäjja vuässõʹtte Jyväskylä universiteeʹtt siõrr-raajjmõõžž äʹšštobddji lââʹssen Lappi universiteeʹtt projeʹktt-tuâjjla. Tuâjjpääʹjest nuõrtt- da aanarsääʹmǩiõli äʹšštoobdjid harjjnõʹtteš siõrrâmsiiskõõzzi raajjmõʹšše. Jyväskylä universiteeʹtt siõrr-raajjmõõžž äʹšštoobdi – professor Ulla Richardson, tuʹtǩǩeemkoordinaattor Lea Nieminen di suåvldõsplaaneei Mika Halttunen – vaʹsttee harjjnâttmõõžžâst. 

Lohkanlihkku-projeeʹktest rajjum sääʹmǩiõllsaž siõrrversioi vuâđđan lij tuʹtǩǩummša vuâđđõõvvi Lukukupla-siõrr. Jyväskylä universiteeʹttest lij kuʹǩesäiggsaž ǩiõččlâsttmõš siõr šiõttummšest jeeʹres ǩiõlid da ortografiaid. Siõr ǩiõlʼlaž da pedagooglaž siiskõõzzid plaaneet juõʹǩǩ-i ǩiõl jiiʹjjesnallšemvuõđi mieʹldd, täävtõssân ij leäkku lääʹddǩiõllsaž siõr vuõigg jåårǥlâttmõš. Raajjâmtuâj ohjjee ǩeâllʼjeei ouddnummuž vuâđđjuʹrddi di kulttuurlaž vaʹstteemvuõtt še.  

Siõr täävtõssân lij tueʹrjjeed lookkmõõžž da ǩeeʹrjtummuž vuâđđtääidai mättjummuž. Haʹrjjtõllum tääid lie jeäʹrbi mieʹldd jiõnnõõǥǥi da bukvai tobddmõš, jiõnnõk-bukva-vaʹstteeivuõđ vaaldšummuš, täävai da saaʹni lookkmõš di siõmmnai siõmmnai uuʹccab õhttõõǥǥin šuurbid ouddneei lookkmõš. Lââʹssen haʹrjjtõõlât lookkmõõžž soojlõsvuõđ da jåʹttlõsvuõđ. 

Haʹŋǩǩõs jäʹrjsti tuâjjpääʹj õhttvuõđâst kaaunõõttmõõžž Sääʹmteeʹǧǧ mättmateriaalkonttrin di äävai čiõʹlǧǧeemšõddmõõžž 8.4.2026. Kuhttu šõddmõõžžin haʹŋǩǩõõzz äʹšštoobdi čiõlǥte haʹŋǩǩõõzz täävtõõzzid da tääʹrǩmõs toiʹmmjemvuâđđjurddjid mättjemsiõrâst, koon haʹŋǩǩõõzzâst raajât. Vuässõõđi vueiʹtte še puʹhtted ouʹdde jiiʹjjes vueiʹnlmid da uʹvdded maacctõõzz. Haʹŋǩǩõs pârgg nâânn õhttsažtuõjju čõõnâsjooukivuiʹm, što mättjemsiõr, koid raajât, veʹǩǩe ooudâs sääʹmǩiõli mättʼtummuž di väʹldde lokku mättjeeʹji määŋgnallšem vueʹlǧǧemsõõʹjid. 

Saǥstõõllmõõžžâst Sääʹmteeʹǧǧ mättmateriaalkonttrin da äävai čiõʹlǧǧeemšõddmõõžžâst kaggõõđi ouʹdde vääžnai ǩiõččâmvueʹjj sääʹmǩiõli mättʼtummšest da mättjummšest.  Saǥstõõllmõõžžin täʹrǩstõʹlleš jeäʹrbi mieʹldd siõrrâmsiiskõõzzi ǩiõlʼlaž da kulttuurlaž vuälladvuõđid, mättmateriaali rool di siõr pedagooglaž toiʹmmjemvuõđ da motivâʹsttemvuõđ.  

Äävai čiõʹlǧǧeemšõddmõʹšše vuässõʹtte mättʼtem- da peâmmamsueʹrj ämmatneeʹǩǩ, kook eeʹttkõʹstte aanar- nuõrtt- da tâʹvvsääʹmǩiõllsaž mättʼtummuž da ouddpeâmmʼmõõžž. 

Snimldõõǥǥâst čiʹǯsbeäʹlnn: ǩiõlläʹšštobddi Terhi Harju, projeeʹkt jååʹđteei professor Pigga Keskitalo, tuʹtǩǩeemkoordinaattor Lea Nieminen, ǩiõlläʹšštobddi Petra Kuuva, professor Ulla Richardson di projeʹkttršurr Kristiina Jomppanen 

Ǩiõlläʹšštoobdi Petra Kuuva da Terhi Harju lie alttääm tuâj Lappi universiteeʹttest Lohkanlihkku-projeeʹktest njuhččmannu 1. peeiʹv. Ǩiõlläʹšštoobdji tuâjjan lij aanar- da nuõrttsääʹmǩiõllsaž siiskõõzz puutʼtummuš proʹjeektest rajjum lookkmõõžž da ǩeeʹrjtummuž vuâđđtääidai mättjemsiõʹrre. 

Ǩiõlläʹšštoobdji tuâjj čiŋlmââvv siõr siiskõõzz plaanummša da ǩiõllʼlaž kvaliteeʹtt ainsmâttmõʹšše. Tuâjj tuärjjad aanar- da nuõrttsääʹmǩiõllsaž alggmättʼtõõzz da ǩiõli mättmateriaalvueʹjj.    

Petra Kuuva tåimm aanarsääʹmǩiõl äʹšštobddjen Lohkanlihkku-projeeʹktest. Son lij ouddâl reâuggam jeäʹrbi mieʹldd aanarsääʹmǩiõllsaž klassuʹčteeʹlen, jeäʹrben oudd- da alggmättʼtõõzzâst, di plaaneeʹjen Sääʹmteeʹǧǧ päärnaimateriaalhaʹŋǩǩõõzzâst, koʹst raʹjješ jeäʹrbi mieʹldd kueʹhtt mobiilsiõr aanar-, nuõrtt- da tâʹvvsääʹmǩiõlid.  

Terhi Harju tåimm nuõrttsääʹmǩiõl äʹšštobddjen Lohkanlihkku-projeeʹktest. Son lij tuejjääm ouddâl jeeʹresnallšem tuâjaid nuõrttsääʹmǩiõlin, jeäʹrbi mieʹldd ǩiõlltuâjjliʹžžen Sääʹm Ǩiõllkaʹlddjest, ǩiõl jåårǥlõʹttjen da tulkkân di Saaʹmi siidsåbbar piisren.  

Lohkanlihkku-projeʹktt veekk ooudâs sääʹmǩiõli kuâsttjemvuõđ da âânnmõõžž di tuärjjad tõõi seillmõõžž da ouddnummuž ânnʼjõžääiʹj õhttsažkååʹddest. Projeeʹktest rajjum materiaal šâʹdde sääʹmǩiõllsaž uʹčteeʹli da puärrsi tuärjjan. Ođđ ǩiõlläʹšštoobdji rekrytâsttmõš lij vääžnai läuʹǩǩ projeeʹkt täävtõõzzi õsttmõõžžâst. Lohkanlihkku-siõr raajât õhttseʹžže viiđ sääʹmǩiõʹlle: saujj-, aanar-, nuõrtt-, juuʹlev- di tâʹvvsääʹmǩiõʹlle. Lohkanlihkku lij nuʹtt projeeʹkt nõmm ko siõr tâʹvvsääʹmǩiõllsaž nõmm. Siõr nõõm projeeʹkt jeeʹres sääʹmǩiõlin õʹlmstââʹttet mâʹŋŋlest.  

Õhttvuõtt-teâđ:  

Projeʹkttšurr Kristiina Jomppanen 

Kristiina.jomppanen@ulapland.fi  

Aanarsääʹmǩiõl äʹšštobddi Petra Kuuva  

petra.kuuva@ulapland.fi  

Nuõrttsääʹmǩiõl äʹšštobddi Terhi Harju  

terhi.harju@ulapland.fi