CAP-SHARE - Yhteisen osaamisen rakentamista yhteisöjen, päätöksentekijöiden ja tutkijoiden välille    

Pigga Keskitalo

Professor Pigga Keskitalo lii vuálgus Ucjuuvâst já tááláá áásá Iänuduvâst. Sun tuáimá šoddâdemtiettuu professorin Laapi ollâopâttuvâst já stivree CAP-SHARE-haavâ Suomâ uásihaavâ. Keskitalo lii škovliittâsâs peeleest luokamáttáátteijee já lii nágáttâllâm Laapi ollâopâttuvâst ive 2010 sämiškoovlâ kulttuursensitivlâšvuođâst. Ovdeláá sun lii porgâm Taažâst sämmilii máttáátteijeeškovliittâsâst. 

Keskitalo pargoost tiäduttuvvojeh arktisâš škovlim, sämikielah já pedagogik, kielâlâš já kulttuurlâš vuoigâdvuođâlâšvuotâ sehe párnái já nuorâi uásálâšvuotâ muttojeijee pirrâsist. Sun ávhástâl pargostis siärváduvâst vuálgus já uásálistittee metodijd, main páihálâš tiätu, vuáttámušah já jieškote-uv suhâpuolvâi uáinuh puáhtojeh škovlim ovdedem uássin. 

CAP-SHARE-haahâ Suomâst vuájudât toos, et maht nuorah, škoovlah, miärádâsâi tahheeh já siärváduvah pyehtih huksiđ uásálistittee já vuoigâdvuođâlijd vuovijd västidiđ biodiversitet koččâmuššáid já šoŋŋâdâhnubástus vaiguttâssáid. Algâaalmuguáinu uáivild taan ohtâvuođâst tom, et sämisiärváduvâi kielah, kulttuur já páihálâš pirrâsân lohtâseijee tiätu láá fáárust miärádâsâi tohâmist já puátteevuođâ čuávdusij huksiimist. Tarkkum vuálásâžžân láá meid koččâmušah, moh lohtâseh eellimpirrâs nubástussáid, eennâm kevttimân, luándu maaŋgâhámásâšvuotân já ärbivuáválijd iäláttâssáid. 

Haahâ kiävttá iärásij lasseen digitallijd já kreativlijd metodijd, tego mainâstem, visuallijd já sajan čonnum pargopáájáid sehe jieškote-uvlágán páihálii pirrâsân já luándun tuvdâšuvvee oppâmpirrâsijd. Ulmen lii hammiđ soojijd, main nuorah pyehtih miäruštâllâđ jieijâs uáinuid kilelis puátteevuođâst já uásálistiđ huksejeijee vuovvijn meid hastâleijee pirâskoččâmušâi kieđâvušmân oovtâst páihálij tuáimeiguin.