CAP-SHARE-haahâ palhâšui puátteevuođâ pajaneijee almonin 

CAP-SHARE – Ohtsij máátui huksim siärváduvâi, miärádâstahhei já totkei kooskâ -haahân mieđettui Interreg NPA -palhâšume 1.10.2025 Bodöst, Taažâst. Haavâ koordinist Island luánduhistorjálâš museo já kyeimin tuáimih Laapi ollâopâttâh já Arctic Frontiers Taažâst.  

 
Interreg NPA -palhâšume mieđettui Pajaneijee almoneh -kategoriast. Kategoriast pajeduvvojeh uáinusân staatâi koskâsiih oovtâstpargohaavah, moh pyehtih merhâšitteht hammiđ Arktisii kuávlu puátteevuođâ uđđâ maalij, ideai tâi vuáválâšvuođâi vievâst. 

CAP SHARE -haavâ ulmen lii kavnâđ uđđâ vuovijd luándu maaŋgâhámásâšvuođâ suoijâlmân já šoŋŋâdâhnubástusân västidmân. Palhâšumevuáđustâsâin páhuduvvoo, et haahâ lii oovdâstjotten ráhtám uđđâ šooldijd já kyeimivuođâid siärváduvâi, totkei já miärádâstahhei kooskâ. 

Arktisii kuávlu nuorâi jienah kuávdáást 

Haavâ váimusist láá tave páihálâšsiärváduvâi já sämisiärváduv nuorah. Nuoráid fállojeh máhđulâšvuođah kieđâvuššâđ sehe ärbivuáválii já tieđâlii tiäđu luándu maaŋgâhámásâšvuođâst já ovdediđ suhâpuolvâi koskâsii vuárusavâstâllâm, ohtâvuođâ já ibárdâs. 

Haavâ ovdâsvástádâslâš jođetteijee Ragnhildur Guðmundsdóttir Island luánduhistorjálii museost muštâl, et haavâst porgum oovtâstpargo lii čáittám, maht museoh pyehtih toimâđ oovtâviärdásâžžân saijeen vuárusavâstâlmân, mii ráhtá šooldijd siärváduvâi, miärádâstahhei já totkei kooskân. 

– Ko mij uásálistittep nuorâid já siärváduvâid, te mij huksip siämmást luáttámuš já áárvust anneem páihálii já algâaalmugij tiätun oovtâst tieđâlijn tiäđoin. Suhâpuolvâi koskâsijd kuáhtáámáid rahtum sajeh nanodeh nuorâi aktivlii uásálistem já išedeh kuullâđ siärváduvâi maaŋgâid jienâid, Guðmundsdóttir juátká. 

Laapi ollâopâttuv uásihaavâ jođetteijee professor Pigga Keskitalo loptee uáinusân haavâst pargo sämisiärváduvâi sehe párnái já nuorâi tieđâšoddâdemviärmádâh LUMA:in. 

– Mij ovtâstittep šoddâdemtiettui já luándutiettui uáinimčievâid ärbivuáválii páihálii tiätun tave já sämisiärváduvâin ohtsâštoimâlij metodijguin oovtâstpargoost LUMA-kuávdáin, Keskitalo muštâl. 

Taažâ kyeimiorganisaatio Arctic Frontiers hahâhovdâ Jenny Turton mield haahâ lii eromâš šiev ovdâmerkkâ tast, et maht kuávdááh čonâsjuávhuh pargeh oovtâst vâi nanodiččii mátuidis, kapasitet já mohtâvuođâ luándu maaŋgâhámásâšvuotân lohtâseijee koččâmušâin. 

– Mij lep uáinám aktivlii uásálistem já pyeremus vuáválâšvuođâi jyehim nuuvt pargosyergis algâmuddoost leijee uáppein ko Euroop komissio ollâ miärádâstahhei tääsi rääjist. Taat lii uáli šiev vyelgimsaje kapasitet huksiimân páihálii tääsist, Turton täärhid. 

Kejâstâh puátteevuotân 

Kulmâ ive pištee haavâst (2024–2027) láá olášuttum nelji viermipargopáájá, moh láá vuájudâttâm Arktisii kuávlu luándu maaŋgâhámásâšvuođâ tuárjoo toimáid. Viermipargopáájáid puáhtá uápásmuđ čujottâsâst Interreg NPA – CAP-SHARE . 

Puáttee iivij CAP-SHARE uárnee páihálijd tábáhtusâid Islandist, Suomâst já Taažâst. Ulmen lii ovdiist-uv čiäŋudiđ oovtâstpargo, nanodiđ maaŋgâi jienâi kullum já tuárjuđ savâstâllâđ luándu maaŋgâhámásâšvuođâst, killeelvuođâst já ruánáá sirdâšuumeest. 

– Palhâšume ij lah tubdâstâs tuše CAP-SHARE:n, pic puohháid toid, kiäh uásálisteh ohtâvuođâi naanoodmân Arktisii kuávlust, proojeekttiimi kijttá. 

Haavâ Suomâ juávhu proojeekthovdâ Rauni Äärelä-Vihriälä, Sämitige nuorâirääđi ovdâsteijee  Niila-Juhán Valkeapää já hahâhovdâ Pigga Keskitalo Laapi ollâopâttuvâst nuorâipaaneel ohtâvuođâst Arctic Spirit konferensist Arktikumist 7.5.2025 Ruávinjaargâst.  

Uápásmuu CAP-SHARE-haahân 

LinkedIn: CAP-SHARE: Overview | LinkedIn  
Viermisiijđoh: Interreg NPA – CAP-SHARE