CAP-SHARE-haʹŋǩǩõõzz ciʹstte puõʹttiääiʹj pâjjneei eettmõššân   

CAP-SHARE – Õhttsaž siltteem raajjmõš õhttõõzzi, tuʹmmstõkraajjʼji da tuʹtǩǩeeʹji kõskksaž -haʹŋǩǩõʹsse miõʹtte Interreg NPA -ciist 1.10.2025 Taarr Bodõst. Haʹŋǩǩõõzz koordinõõʹsti Island luâtthistoorlaž muʹzei õhttsažtuâjast Lappi pââimõs-škooul da Arctic Frontiers Taarrâst. 

Interreg NPA -ciist miõʹtte Pâjjneei eettmõõžž -kategoriast. Kategoriast kaʹǧǧe ouʹdde valdiai kõskksaž õhttsažtuâjjhaʹŋǩǩõõzzid, kook vueiʹtte miârkkteeʹjen miõllâd Aarktlaž vuuʹd puõʹttiääiʹj ođđ maali, ideai leʹbe vueʹjji vieʹǩǩin. 

CAP SHARE -haʹŋǩǩõõzz täävtõssân lij kaunnâd ođđ kuånstid luâđ määŋghämmsažvuõđ  suejjummša da äimm-muttsa vaʹstteem diõtt. Cisttâmvuâđđäʹššen tuõʹtte, što haʹŋǩǩõs lij ooudâst jooʹttjen raajjâm ođđ õhttvuõđid da toiʹmmjeeʹjid õhttõõzzi, tuʹtǩǩeeʹji da tuʹmmstõkraajjʼji kõskksa. 

Aarktlaž vuuʹd nuõri jiõn kõskksââʹjest 

Haʹŋǩǩõõzz kõskksââʹjest liâ tâʹvvjânnam pääiklažõhttõõzzi da sääʹmmõhttõõzzi nuõr. Nuõrid taʹrjjee vueiʹtlvažvuõđid ǩiõttʼtõõllâd äʹrbbvuõđlaž de tiõđlaž teâđ luâđ määŋghämmsažvuõđâst da oouʹdeed puõlvvõõǥǥi kõskksaž vuârrceälkkmõõžž, õhttvuõđ da fiʹttõõzz. 

Haʹŋǩǩõõzz vaʹstteemvuõđlaž jååʹđteei Ragnhildur Guðmundsdóttir Islaand luâtthistoorlaž muʹzeeʹjest peäggat, što haʹŋǩǩõõzzâst rajjum õhttsažtuâj lij čuäʹjtam, mäʹhtt muʹzei vueiʹtte tåimmad õõutverddsaž sââjjan vuârrceälkkmõʹšše, kååʹtt rääjj õhttvuõđid õhttõõzzi, tuʹmmstõkraajjʼji da tuʹtǩǩeeʹji  kõʹsǩǩe.  

– Tâʹl ǥu vuässâʹttep nuõrid da õhttõõzzid, raajjâp seämma ääiʹj naʹddjõõzz da ärvvouddmõõžž pääiklaž da alggmeerai tiõttu õõutsââʹjest tiõđlaž teâđain. Puõlvvõõǥǥi kõskksaž teivvmõʹšše rajjum pääiʹǩ raʹvvje nuõri aktiivlaž vuässõõttmõõžž da veäʹǩǩte kuullâd õhttõõzzi määŋgnallšem jiõnid, Guðmundsdóttir juätkk.  

Lappi pââimõs-škooul vueʹsshaʹŋǩǩõõzz jååʹđteei professor Pigga Keskitalo kägg ouʹdde haʹŋǩǩõõzzâst raajjâm õhttsažtuâj sääʹmmõhttõõzzi de päärnai da nuõri tiõđšõddeemsäiʹmmõõzz LUMA:in. 

– Õhtteep šõddeemtiõđi da luâtt-tiõđi vueiʹnnemkuuʹlmid äʹrbbvuõđlõʹžže pääiklaž tiõttu tâʹvvjânnmin da sääʹmmõhttõõzzin õhttsažtåimmam mõõntõõllâm vieʹǩǩin õhttsažtuâjast LUMA-kõõskõõzzin. Keskitalo ceälkk.  

Taarr toiʹmmjeeiorganisaatia Arctic Frontiers  haʹŋǩǩõsjååʹđteei Jenny Turton mieʹldd haʹŋǩǩõs lij samai pueʹr ouddmiârk tõʹst, mäʹhtt kõskksaž čõõnâsäʹrttel tuejjee õõutsââʹjest raʹvvjem diõtt jiijjâs silttummuš, kapasiteeʹtt da miõllǩiddsažvuõđ luâđ määŋghämmsažvuõđ kuulli kõõččmõõžžin.    

–  Leäʹp vuäinnam aktiivlaž vuässõõttmõõžž da pueʹrmõõzzi mõõntõõllâmnaaʹli juâkkmõõžž nuʹtt tuâj alggmääʹttest åårrai mättʼtõõttjin ǥu Euroop komissio õlli tuʹmmstõkraajjʼji tääʹzzest. Tät lij pueʹr vueʹlǧǧemsââʹjj kapasiteeʹtt raajjmõʹšše pääiklaž tääʹzzest, Turton čiõlǥat. 

Ǩicstõk puõʹttiäigga 

Koolmekksaž haʹŋǩǩõõzzâst (2024-2027) liâ čõõđtam nellj säiʹmmõstuâjjpääʹj, kook liâ kõskkääm Aarktlaž vuuʹd luâđ määŋghämmsažvuõđ staanam tååimid. Säiʹmmõstuâjjpääʹjid vuäitt tobdstõõttâd addrõõzzâst Interreg NPA – CAP-SHARE . 

Puõʹtti eeʹjjin CAP-SHARE reäšš pääiklaž noorõõttmõõžžid Islaantâst, Lääʹddjânnmest da Taarrâst. Täävtõssân lij veâl jeänab čiŋlmâʹtted õhttsažtuâj, raʹvvjed määŋgnallšem jiõni kuullmõõžž da staanâd saǥstõõllmõõžž luâđ määŋghämmsažvuõđâst, peʹšttemvuõđâst da ruõnâs seʹrddmest.  

–  Tät cistt ij leäkku pâi tobdstõs CAP-SHARE-haʹŋǩǩõʹsse, ba pukid tõid, ǩeäk vuässõʹtte õhttvuõđi raʹvvjummša Aarktlaž vuuʹdest, projeʹktt-tiim späʹssbââšš.     

Haʹŋǩǩõõzz Lääʹddjânnam projeʹkttjååʹđteei Rauni Äärelä-Vihriälä, Sääʹmteeʹǧǧ nuõrisuåvtõõzz eeʹttiǩ Niila-Juhán Valkeapää da haʹŋǩǩõsjååʹđteei Pigga Keskitalo Lappi pââimõs-škooul nuõripaneeʹl õhttvuõđâst Arctic Spirit konfereeʹns Arktikum 7.5.2025 Ruäʹvnjaarǥâst.  

Tobdstõõđ CAP SHARE -haʹŋǩǩõʹsse 

LinkedIn: CAP-SHARE: Overview | LinkedIn  
Neʹttseeid: Interreg NPA – CAP-SHARE