Lohkanlihkku

Lohkanlihkku lii kulmâ ive pištee Interreg Aurora -ovdedemhaahâ. Haavâ ulmen lii tuárjuđ sämikielâi algâmáttááttâs tile já huksiđ viiđâ sämikielân luuhâm- já čäällimtááiđu oppâmspeelâ, Lohkanlihkku. Ton lasseen viestâdmist já sämisiärváduv uásálistitmist lii haavâst kuávdáš roolâ. Lohkanlihkku lii tavesämikielâ já uáivild luuhâm luho.

Sämikielâ máttááttâsâst hástun lii lamaš kuhháá oppâmaterialij vänivuotâ. Máttáátteijeeh kärttih távjá jiejah pyevtittiđ materialijd tâi kevttiđ puárásmâm oppâmaterialijd. Taan táárbun västid Lohkanlihkku. Lohkanlihkku-haavâ ulmen lii ovdediđ viiđâ sämikielân digitallii oppâmspeelâ, mii oovded já naanood párnái luuhâm- já čäällimtááiđu. Ton lasseen haahâ tuárju já totká sämikielâi luuhâm- já čäällimtááiđu máttááttâs.

Lohkanlihkku-spellâ vuávájuvvoo suomâkielâlii Lukukupla-speelâ vuáđuld. Lukukupla lii vijđáht tutkum, já ton toimâmloogik taha máhđulâžžân párnái persovnlii luuhâm- já čäällimtááiđu árvuštâllâm. Spellâ vuáhádut hárjuttâsâid uáppee persovnlij táárbu mield. Lohkanlihkku šadda leđe mávsuttáá luođimnáál moobilpiergâsân. Haavâ kielah láá anarâškielâ, tavekielâ, juulevsämikielâ, maadâsämikielâ já nuorttâlâškielâ.

Lohkanlihkku-haahâ puávdee sämikielâi máttáátteijeid, uáppeid, vanhimijd já sämisiärváduv jesânijd uásálistiđ aktivlávt ovdedempaargon já visásmittiđ, et spellâ spejâlist sämikulttuur já máttááttâs tuotâvuođâ. Haavâ ääigi uárnejuvvojeh meid škovlâkolliimeh já pargopáájáh máttáátteijeid já uáppeid.

Pargojuávkun kuleh Laapi ollâopâttâh, Jyväskylä ollâopâttâh, Ummee ollâopâttâh já Säämi ollâškovlâ. Haavâ joođeet Laapi ollâopâttuv professor Pigga Keskitalo. Ruttâdeijen tuáimá Interreg Aurora. Laapi já Jyväskylä ollâopâttuvâi aalmuglâš ruttâdemuási puátá Laapi littoost. Taažâ uásitooimâid ruttâdeh Interreg Aurora lasseen Taažâ Sämitigge, Barents-čälleeviehâ, Tromssa eennâmkodde já Säämi ollâškovlâ.

Haavâ tooimah juáháseh kuulmâ pargopakettân:

1. Sämikielâi algâmáttááttâs tile já metodij nanodem

Vuossâmuu uásivijđoduv ulmen lii nanodiđ sämikielâi luuhâm- já čäällimtááiđu máttááttâs tile já metodijd. Máttáátteijeesahhiittâlmij vievâst haavâ ääigi norroo tiätu sämikielâi algâmáttááttâsâst já luuhâm sehe čäällim máttááttemmetodijn. Tiätu stivree speelâ vuávám västidiđ máttááttâs táárbuid.

2. Speelâ huksim viiđâ sämikielân

Nubbe pargopakkeet vuájudât máttáátteijei škovliimân sehe speelâhámásii máttááttâs ištâdem sämikielâi máttááttâsân (pelillistäminen). Sämikulttuur šadda uáinusân speelâst kielâ lasseen graafisij elementij sehe muusik peht. Testam já škovlâpilotistem vievâst árvuštâlloo, et maht spellâ tuáimá máttááttâsâst já magareh vuárdámušah siärváduvâin láá siskáldâslijd já kulttuurlijd elementáid. Ton lasseen haavâst ráhtojeh vijđes uáppáh speelâ kevttimân máttááttâsâst sehe speelâ vuáhádutmist sämikieláid.

3. Tieđettem já speelâ almostittem

Haavâ ääigi dokumentistojeh já juáhhojeh aktivlávt puoh haavâ tooimah. Haahâ uárnee webinarijd, škovlâkolliimijd já teivâmijd. Pargoost almostittojeh tieđâliih artikkeleh já raporteh. Lohkanlihkku-spellâ almostittoo rijjâ luođimnáál moobilpiergâsáid.